PATIK NI DEBATA (HUKUM TAURAT)

PATIK NI DEBATA

Patik parjolo :

          

        Ahu do Jahowa Debatam ! ninna Debatanta. Ndang jadi marangkup Ahu bahenonmu Debatam !

Dia do lapatan ni i ?

          On do : Ingkon umbiar rohanta jala humolong jala umpos mida Debata asa mida nasa na adong.

Patik paduahon :

          Ndang jadi ganaonmu jala ndang jadi sumanonmu manang aha na di banua ginjang dohot na di banua tonga on ro di na di bagasan aek na di toru tano, ianggo tung gabe sisombaon manang sioloan.

Dia do lapatan ni i ?

          On do : Ingkon dihabiari rohanta Debata jala ingkon holong rohanta di Ibana, asa ndang jadi iba marsomba tu sombaon manang tu ganaganaan, mangido hangoluan sian i, jala ndang jadi oloan begu manang ulpuhan ni hadatuon jala ndang jadi pos roha di ugasan homitan.

Patik patoluhon :

          Ndang jadi dohonon goar ni Debata, ianggo so ture dalanna. Ai hona uhumna do sogot angka na marsineang di goarNa.

Dia do lapatan ni i ?

          On do : Ingkon dihabiari rohanta Debata jala ingkon holong rohanta di Ibana, asa unang hita olo mamurai manang manolon-nolon manang marujar-ujar na roa manang margapgap manang mangansi, marhite-hite goar ni Debata; ai di na tarsosak, dohot di hasusaan dohot di tangiang dohot di puji-pujian do sidohonon goar ni Debata.

Patik paopathon :

          Ingot hamu ma pabadiahon ari Minggu i ! Di na onom ari ma ula hamu nasa siulaonmu ; alai anggo ari papituhon i, ari paradianan ni Jahowa Debatam do i. Ndang jadi ho mangula ianggo di na sadari i, manang anakmu pe manang borum, manang naposom lahi-lahi, manang naposom boru-boru, ro di pinahanmu ro di pangisi ni huta ni halak pe, na mangebati hutam. Ai di na onom ari do ditompa Debata langit dohot tano dohot laut dohot nasa isina ; dung i maradian do Ibana di ari papituhon i : Dibahen i do umbahen na dipasu-pasu Debata Jahowa ari paradianan i jala diparbadiai.

Dia do lapatan ni i ?

          On do : Ingkon dihabiari rohanta Debata jala ingkon holong rohanta di Ibana, asa unang tois rohanta di ajar na sian Hata ni Debata ;  ingkon badia do Hata ni Debata di rohanta jala ingkon ringgas rohanta tumangihon dohot mangguruhon.

Patik palimahon :

          Ingkon pasangaponmu do natorasmu, asa martua ho jala leleng mangolu di tano na nilehon ni Jahowa Debatam di ho.

Dia do lapatan ni i ?

          On do : Ingkon dihabiari rohanta Debata jala ingkon holong rohanta di Ibana, asa unang lea-lea rohanta mida natorasta dohot mida angka rajanta ro di angka natua-tua. Ndang jadi paroonta rimas nasida, ingkon pantun do hita jala ingkon holong rohanta tu nasida, sioloan do nasida jala sisubuton do rohana.

Patik paonomhon :

Unang ho mamunu !

Dia do lapatan ni i ?

          On do : Ingkon dihabiari rohanta Debata jala ingkon holong rohanta di Ibana, asa unang hita olo mambahen sahit-sahit tu nasa na magolu ; ingkon roha pangoluhon do rohanta di nasa na mangolu.

Patik papituhon :

Unang ho mangalangkup !

Dia do lapatan ni i ?

          On do : Ingkon dihabiari rohanta Debata jala ingkon holong rohanta di Ibana, asa toman rohanta jala porman dohot pangalahonta ro di hatanta, ianggo angka naung marbagas i, ingkon masiparhamaolan jala masihaholongan.

Patik paualuhon :

Unang ho manangko !

Dia do lapatan ni i ?

          On do : Ingkon dihabiari rohanta Debata jala ingkon holong rohanta di Ibana, asa unang hita olo mandobo hepeng ni dongan jolma, manang mambahen bisuk-bisuk mangalansumhon boniaga. Ingkon sipagandaon ni rohanta do arta ni dongan jala siramothononhon.

Patik pasiahon :

          Unang ho olo manghatindanghon hata na so tutu maralohon dongan jolma!

Dia do lapatan ni i ?

          On do :  Ingkon dihabiari rohanta Debata jala ingkon holong rohanta di Ibana, asa unang hita olo manggap-gapi dongan jolma manang menjehehon manang pahata-hatahon, paoruhon sangapnasida ; ingkon niampinan do dongan jolma anggo so tangkas dope binoto salana, holan uhum na denggan i do paboa-boaon.

Patik pasampuluhon :

          Ndang jadi haliangan ni roham bagas ni donganmu, ndang jadi haliangan ni roham dongan saripe ni donganmu, manang naposona baoa manang naposona boru-boru manang lombuna, manang hodana, manang dia pe ugasan ni donganmu.

Dia do lapatan ni i ?

          On do : Ingkon dihabiari rohanta Debata jala ingkon holong rohanta di Ibana, asa unang hita olo marangkal mangarohai ugasan ni dongan jolma dohot ugasan tinadinghon ni ompuna, siurupanta do nasida mangaramoti nasa ugasanna. Angkup ni i ndang jadi bolabolaonta pardihuta ni dongan jolma manang naposona pe, siapoan do nasida jala sidasdason mandapothon ulaonna hian.

Beha do pandok ni Debata taringot tu patik na sampulu i ?

          On do : Ahu do Jahowa Debatam ! ninna Debatanta, pargogo na so hatudosan jala parrimas, sai luluhononHu do dosa ni ama-ama tu pinomparna ro di sundut patoluhon, ro di sundut paopathon, pinompar ni angka na sogo roha di Ahu, alai asi do rohangku di angka na marriburibu, angka na marholong ni roha di Ahu, na so mangalaosi patikHi.